Storyang Makabilar

by Kent Jestoni Q. Gabo

“Maot lagi ka Dong, nga gwapo man unta ang imong Papa.”

Nakuratan si Pondoy sa pagkapranka sa Papa ni Minda. Ikapila na niya naengkwentro ning lakiha, apan sama sa bala sa pusil nga nibuslot sa iyang dughan ang mga gipanlitok ani. Kabalo siyang maot siya. Kini gisilsil na sa iyang utok sa iyang magulang sukad pang bata sila.

”Aw, kul, maayo ako kay katingad-an, ang dagway sa imong dalaga kay di na ta matingalang maot, kay naliwat man sa imoha.”

Kini ang suwito nga tubag ni Pondoy, apan sa hunahuna lamang niya kini niundang ug wa’h na nidayon sa iyang baba kay baka mao pa ning hinungdan nga di siya sugtan sa hangyo niya sa tiguwang.

”To mats lab wel kel yu. Ep yo kant mek ap yor mayn.”

Sa dihang nikalit rag buto ang nagadagondong nga video singko sa duol rang imnanan nga nagpakurat sa unod sa duha nga nakaistorbo hinoon sa ilang lalom na kaayong gihisgotan. Ikalimang beses na ni gipatukar aning adlawa, ug sa karong puntoha nga dapit alas diyes sa buntag, nakaila dayon si Pondoy kinsa ang niarangkadag siyagit kauban sa pinakurog ug pinabundak nga tingog. Iya na pud ning kinakusgan ug buotang amahan nga wa’h nay laing hibaw-an kun dili mag-inom ug magtong-its.

“Tan-awa imong amahan Dong, gwapo na nindot pa ug tingog.  Asa na lang ka ibutang.”

“Nindot? Maluoy na lang ta. That’s rubbish and pathetic! He sounds like a cow mooing its way down from the 35th floor of a building!”

Feel kaayo ni Pondoy ang justice sa pagsuhid-suhid kay Simon Cowell nga iyang paboritong tighusga sa nag-inusarang palabas sa TV nga iyang ginasubaybayan. Kung ambi nimo kini wa’h na pud niya gilitok, sakto ka, kay ang natubag lamang niya kay “K.”

“Lagi ba. Nakapalit na ka atong bag-ong album ni Lady Gaga nga Born This Way? Nindot kaayo Dong. Nadownload nako ganiha lang sa itunes,” ang panghinambog sa kaistoryang Pondoy.

“Wa’h kul uy. Pero nakadownload ko ganiha sa Mediafire ug katong Christmas album ni Justin Bieber nga Under the Mistletoe. Nindot ba tong Home This Christmas kay featuring ang The Band Perry,” tubag ni Pondoy.

“Pagsure ba kay magbiko ta’g pink! Speaking of… Inday pamalengke kay magmerienda tag puto maya unya,” gitawag sa tiguwang ang iyang asawa nga sama ra sa usa ka katabang.

“WTF! e0w poWhz. eNdhi kUh paH vHa zaWha jUn? Ei wAn wIk nAh uS 8yt nG 8yt nYan,” pinataas ug kilay nga tubag sa jejemon nga baye uban sa daw gadulag angry birds nga pagteks sa iyang Nokia 3315 nga cellphone.

Walay laing naingon ang bana kun dili “K”. Nakahinomdom siya kalit nga naa man diay siya kaestoryang batan-on dinha sa ilang sala nga daw Magay lang sa kagubot ug kabaho. “Aw, Dong. Wah man ka nagtell, naa pa man diay ka dira.  Unsa gani balik to imong tuyo?“

“Aw, wah ra kul uy. Balik na lang ko ugma kay murag udto na man,” luya nga nitubag si Pondoy.

“Sure? Magluto ra ba akong asawa ug fish filet de el niño,“ dakong panghinambog sa tiguwang.

“Ok ra lagi kul uy. Baka nagluto pud tog bulad si Mamang. Sige na kul, maghinay hinay na ko ug aginod. Te, moadto sah ko.“

Nakadukong migawas si Pondoy sa purtahan. Kabalo siyang sa sunod adlaw moari na pud siyag balik aning balaya. Ug maskin kabalo siyang ang sunod mapareha ra sa mga niaging mga adlawa, mobalik ra gihapon siya. Ug sa ikaunom nga beses, naa na pud mipalahutay’g singgit sa duol nga videokehan ug ”To mats lab wel kel yu. Ep yo kant mek ap yor mayn.”